കോട്ടയം: തിരുനക്കര പൂരം കൊടിയിറങ്ങിയപ്പോള്‍ തെരഞ്ഞെടുപ്പ് ഉത്സവത്തിനു കൊടിയേറി. ഇനിയുള്ളത് ഉത്സവത്തിന്‍റെ പ്രധാനദിവസങ്ങളാണ്. യുഡിഎഫ് സ്ഥാനാര്‍ഥി കെ. ഫ്രാന്‍സിസ് ജോര്‍ജിന്‍റെ പ്രചാരണാര്‍ഥം രാഹുല്‍ ഗാന്ധി വ്യാഴാഴ്ച വൈകുന്നേരം തിരുനക്കരയിലെത്തും.
കോട്ടയം മണ്ഡലത്തിലെ രാഹുലിന്‍റെ ഏക പ്രചാരണ പരിപാടിയാണിത്. വി.ഡി. സതീശന്‍, രമേശ് ചെന്നിത്തല, എം.എം. ഹസന്‍, പി.ജെ. ജോസഫ്, പാണക്കാട് സയ്യിദ് സാദിഖലി ശിഹാബ് തങ്ങള്‍, സി.പി.ജോണ്‍ ഉള്‍പ്പെടെ പങ്കെടുക്കും.
എല്‍ഡിഎഫ് സ്ഥാനാര്‍ഥി തോമസ് ചാഴികാടന്‍റെ പ്രചാരണാർഥം സിപിഎം പോളിറ്റ് ബ്യൂറോ അംഗം സുഭാഷിണി അലി 19നു കുമരകം, കുടമാളൂര്‍, നാട്ടകം എന്നിവിടങ്ങളിലെ സമ്മേളനങ്ങളില്‍ പങ്കെടുക്കും.
സിപിഐ സംസ്ഥാന സെക്രട്ടറി ബിനോയി വിശ്വവും വരുംദിവസങ്ങളില്‍ യോഗങ്ങളില്‍ പങ്കെടുക്കും. മന്ത്രി പി. പ്രസാദ്, മുല്ലക്കര രത്നാകരന്‍, എം. സ്വരാജ്, സി.എസ്. സുജാത, വിജു കൃഷ്ണന്‍ എന്നിവര്‍ കുടുംബയോഗങ്ങളിലും പൊതുയോഗങ്ങളിലും പങ്കെടുക്കുന്നുണ്ട്.
