മരങ്ങാട്ടുപിള്ളി: ഹോംനഴ്‌സായി ജോലി ചെയ്യുന്ന വീട്ടില്‍നിന്നും സ്വര്‍ണവളകള്‍ മോഷ്ടിച്ച കേസില്‍ യുവതിയെ പോലീസ് അറസ്റ്റു ചെയ്തു. എരുമേലി വയലപരമ്പില്‍ അശ്വതി (36)യെയാണു മരങ്ങാട്ടുപള്ളി പോലീസ് അറസ്റ്റു ചെയ്തത്.ഇവര്‍ ഹോംനഴ്‌സായി ജോലി ചെയ്തു വന്നിരുന്ന കടപ്ലാമറ്റത്തെ വീട്ടിലെ വൃദ്ധയുടെ കൈയില്‍ കിടന്ന രണ്ടു വളകള്‍ മോഷ്ടിക്കുകയായിരുന്നു. മോഷണത്തിനുശേഷം ബന്ധു മരിച്ചതായി അറിയിച്ച് ഇവര്‍ ഇവിടെനിന്നു കടന്നുകളയുകയായിരുന്നു. പരാതിയെത്തുടര്‍ന്ന് മരങ്ങാട്ടുപിള്ളി പോലീസ് കേസ് രജിസ്റ്റര്‍ ചെയ്യുകയും ഇവരെ അറസ്റ്റു ചെയ്യുകയുമായിരുന്നു.മോഷണത്തിനുശേഷം ഇവര്‍ സ്വര്‍ണം എരുമേലിയിലുള്ള കടയില്‍ വില്‍പ്പന നടത്തുകയും ഇവിടെനിന്നു പോലീസ് സ്വര്‍ണം കണ്ടെടുക്കുകയും ചെയ്തു. കോടതിയില്‍ ഹാജരാക്കിയ ഇവരെ റിമാന്‍ഡ് ചെയ്തു.
